Skermer

In gesicht lûke

logo.ensafh

Yn guon diskusjes en oanfarringen mei myn frou lûk ik in neffens har in ‘link’ gesicht.
Se begjint dan te laitsjen en seit: ‘Sjoch nochris sa.’
Dat doch ik en nochris en wer. En alle kearen laket se lûder en langer.
As ik myn nocht ha lûkt se earst in beteutere gesicht en dan in eigenwiis gesicht.
Myn ‘link’ gesicht en har ‘eigenwiis’ gesicht hat se in oerkoepeljende beneaming foar: stoer.
As ik safolle oeren nei har it bêd opsykje kipet se ûnder de tekkens wei en seit: ‘Moatst net ‘link’ sjen, want dan moat ik pisje fan it laitsjen en ik wol der net ôf moatte.’
En dan sjoch ik ‘link’, mar hat se har al omdraaid.
Ik gesicht lûke is oanstellerij. Mei it lûken fan in gesicht wol men yndruk meitsje, de dingen nei jins hân sette, in oar yn ’e skjirre nimme. En dêr moat om lake wurde. Sa ienfâldich is it.
No ja, sa ienfâldich is it net, want it giet fierder, it iene is net hielendal it oare.
Foar kaberetiers, toanielspilers, sjongers en – in oare kategory – politisy, managers en bankdirekteuren (sa earst mar) is it lûken fan gesichten in fak. Dy út de earste kategory fiere in toanielstik op – wat se dogge is in spultsje, it is sabeare en mear wol it ek net wêze – en men lit jin graach troch harren manipulearje. Dy út de twadde kategory fiere ek in toanielstik op, mar wolle it foar echt trochgean litte, foar bloedige earnst, se wolle jin wat foarhâlde dat men foar wier oannimme moat. Dy lju soe men dêrom mei de kop ûnder wetter hâlde of foar de bek slaan moatte. Mar dat docht men net, yn machteleaze lilkens ferachtet men har.
‘Sjoch net sa,’ seit myn frou.
‘Hoe sjoch ik dan?’
‘Lilk. ferkeard, wat is der? Wêr tinkst oan?’
‘Ik wist net dat ik sa seach.’
Ik luts gjin gesicht. Myn gesicht stie gewoan sa.
Der bestiet in skilderij fan my dêr’t myn frou fan griist. Neffens har hat de skilder my de gesichtssútdrukking meijûn dêr’t eigenskippen fan my yn te sjen binne dêr’t sy in hekel oan hat.
‘Lûk even in gesicht,’ sei se.
Ik sjoch leaf nei har, fereale, mei tagedienens.
Se laket har fuortdaliks slop.
It is my in spul.