Wat hawwe wy mei de peaske in pear prachtich moaie dagen hân. Frij en moai waar, wat wol in minske noch mear. Doe’t it tiisdei en woansdei suver wat koeler wie, koe men dat fuortdaliks fernimme. De jas koe wer oan. En dan merkt men ek hoe gau oft men ta it moaie waar bedoarn is. Want dan sit elk wer te kleien dat it kâld is.
Dan is it moai dat der in stabilere faktor as it waar op ynternet te finen is, en dat is ensafh. Alle fjirtjin dagen farske ûnferfalske Fryske wrâldliteratuer! Hjirby wer in nije ôflevering.

Poëzij

Piter Boersma krijt suver in min sin fan dy ‘pommadearre kwal’ wannear’t er werris in fraachpetear lêst.… Lês fierder

Alderbalder, dat wie tige slagge ôfrûne saterdei yn Poppodium Romein. Goede opkomst, goede dichters en goede muzyk. No, wat wol in minske noch mear? Wy, as organisaasje, binne oer alle boegen tefreden mei it alhiele ferrin.
Op de side stiet al it ferslach fan Hedwig Terpstra mei foar dejingen dy’t it misse moasten, in soarte fan ympresje. Ek foto’s en in filmke.
Takom jier wer…? Om de wurden fan Hedwig oan te heljen: “Dat sjogge we dan wol wer. Dit ensafheest is yn elk gefal tige slagge!”
Hjir earst mar wer in digitale ensafh.

Poëzij

Iksels kom mei it gedicht koalysje.… Lês fierder

Wer in redaksjegearkomste hân en dêrby de kopij trochnommen sadat der wer in nij foarriedsje op de planken leit om de digi te foljen. Ek dizze kear koe it wer minder, al sis ik it sels.
En al ús lêzers witte no grif dat op 12 maart it saneamde ensafheest plakfine sil yn Poppodium Romein te Ljouwert. Noch mar efkes wat reklame, want dit is de lêste digi foar dat feest. De twa bands New Killer Stars en de Hûnekop fersoargje de muzikale noat. Fierders hawwe wy de dichters: Hidde Boersma, Tsead Bruinja, Sytse Jansma, Sigrid Kingma, Elmar Kuiper, Grytsje Schaaf, Janneke Spoelstra en Geart Tigchelaar.… Lês fierder

Wannear’t (moarns betiid) ik dit foaropwurd skriuw wurdt it al wer ljocht oan ’e himel. Wy geane de goede kant wer op wat it waar oanbelanget. Dat it nije wike de foarjiersfakânsje is, seit fansels ek wol wat. Noch efkes en de natoer komt wer op ’e nij ta bloei.
De literatuer bloeit altyd mar troch, ûngelikens hokfoar tiid fan ’t jier wy ek yn libje. Winters geane de edysjes fan sawol de papieren as de digitale ferzjes troch, mar ek simmers (útsein de simmerfakânsje). Skriuwers en dichters bliuwe blykber ek altyd dwaande, want fan harren moatte wy it as redaksje hawwe, fansels.… Lês fierder

De wrâld stiet bytiden letterlik en figuerlik yn ’e brân. Yn Tunesië in grutte heisa en yn Egypte suver noch grutter. Regearingsgebouwen yn flammen op en ôfrûne woansdei sloegen de freedsume demonstraasjes om yn geweld. Wittefolle ferwûnen en sels in deade. Juster sels noch mear geweld en deaden. En yn Austraalje hawwe se no te krijen mei in stik hurde wyn.
By al dat ûnstjoer giet ensafh gewoan fierder. En yn al dy rêst kinne jimme no de folgjende ôflevering fan de digitale ensafh lêze.

Poëzij

De stjerdei is no trije jier lyn, sa skriuwt Ane Bote Jukema oer syn ferstoarne muze.… Lês fierder