De redaksje fûn dat it tiid waard en set besprekkers en harren wurk yn it sintsje. Besprekken roppe op ta diskusje, biede nije lêsmooglikheden en hâlde de literatuer libben, ek bûten de siden fan it boek. Fan juny oant en mei septimber set Ensafh dêrom de literêre besprekking sintraal, online en yn tydskrift nûmer 3, dat op 18 juny útkaam.
Ofrûne freed 30 jannewaris hawwe 33 dichters in fers foardroegen op de Grutte Gedichtejûn yn de smûke Rode Loper te Ljouwert, presentearre troch Myrte Marije Veenbaas. Dizze kear waard der foardroegen yn it Nederlânsk, Katalaansk en fansels it Frysk troch jong en âld, bekende nammen (û.o. Arjan Hut, Janneke Spoelstra, Elmar Kuiper) en nij talint (û.o. Eelke Veltman, Sylke Kingma, Piter Zijlstra). De fersen waarden ôfwiksele mei de Frysktalige muzyk fan Mayte. Op de GGJ is elkenien wolkom, dichters fan alle nivo’s en yn alle talen. Hjirûnder binne de foto’s te finen fan in slagge jûn!
Fotograaf Geart Tigchelaar
Foto’s makke op de 14e Grutte Gedichtejûn fan ensafh, yn de Rode Loper te Ljouwert.… Lês fierder
Freed 27 jannewaris 2023 wie it wer safier: de Grutte Gedichtejûn fan literêr tydskrift ensafh. Diskear op in bysûndere lokaasje: it popup kafee de Gouden Leeuw yn it gebou fan Tresoar yn Ljouwert. In gouden greep kinne jo wol sizze: in seal yn it oars wat sterile Tresoar wie omtovere ta in soarte fan replika fan it eardere kafee de Gouden Leeuw, dat yn it ferline op itselde plak op ‘e Butterhoek stien hat.
Tenei mar in permanint plak jaan, dit kafee!
Der wie in moai oantal dielnimmers, en de sfear wie treflik. Bruno Rummler, sjonger en muzikant, wist it publyk goed by de saak te belûken.… Lês fierder
frij spul
I
de wyn hat frij spul
seist it is net de wyn
mar de geast dy’t frij waret
rattelet nachts oan skoattels
kriget nearne útfanhûzersplak
al stiet er by elke homeie
op wacht
seit moarns fatsoenlik goedei
stapt yn syn golfke en blaast
rjochting eachein oftewol
alles súd fan dokkum
II
de see hat frij spul
seist it is net de see
mar it hert dat opkomt
him weromlûkt
by skimertsjuster opwâlet
en mei krêft him wart tsjin
dyk en ferbod
wer fuortebbet in laachje
slyk en wat los sân
ûnder dyn learzens
is dêr’tst it mei dwaan moatst
III
it grien hat frij spul
seist it is net it grien
mar de siel dy’t widzet
yn alle wynstreken
oars net as rûzje
licht weagje mar nea
fan ’t plak dêr’tst de lodde
yn ’e klaai setst hearst
in gjalp djipper
dolt it net
fierder is der neat dat rikt… Lês fierder
