Poëzij

POËZIJ YN AKSJE

Pleatst op
logo.ensafh

 

Slachtemarathon

De Slachtemarathon 2008 wie foar in tal Fryske dichters oanlieding om by Getswerdersyl protestfersen hearre te litten tsjin de oantaasting fan it lânskip yn Noardwest-Fryslân, mear yn it bysûnder noardeastlik fan Harns.

Hjir spylje yn in relatyf lytse krite in tal earnstige bedrigings, ûnder mear de bou fan in ôfjit-oven, in mooglik binnendykse nije havenútwreiding, grutskalige kassebou en boaiemdaling troch gas- en sâltwinning.

De dichters woenen mei harren aksje it rinnend publyk, dat op de Slachtedei sa genietet fan it lânskip, bewust meitsje fan dizze alarmearjende sitewaasje. U.o. Elmar Kuiper, Abe de Vries, Tsjisse Hettema, Meindert Bylsma en Edwin de Groot hawwe gedichten foarlêze.… Lês fierder

Edwin de Groot

It wytget see

Pleatst op
logo.ensafh

 

(…)
fan de see ferlitten, –
droechfallen is de grûn
in greide wurden foar it fee
(…)

Ut: ‘Leginde’, Sjoerd Spanninga

I

Yn ’e skimerjûntiid sigesaget de binnenwyn
earst noch wat huverich oer de kriten.
Skaait noch wat om yn ’e linige tiennen
fan stege, stoefe wylgekolonnes, mar skielk
fan hûs en hiem ferdreaun.

It greideljocht skikt tsjinstich yn
foar swartsjend skarlekken dat
betûft de polders ynnimt en
stadichwei de pleatsen bestoppet.
Wilens waarmtongjend oranjekarmozyn.

Yn harren elemint no, de flearmûzen.
Stôkblyn weitsjend oer djipstrjemme
fean, oant de dage mei readkoper
oan ’e loft blaast en de houten
rezjiminten wer fersûpe sil.… Lês fierder

Abe de Vries

Wy, te leedomsizzen

Pleatst op
logo.ensafh

 

Tusken ferdwûn Gerbranda en faai Ropta
leit it oait achtslein wûnder fan it mûntsjelân.
Bûtendyksters panderje yn roudoek om:
oranjebesnaffele silûetten yn ’e Kegen.

Jou no jo ear, by eartiids dit Getswerdersyl,
oan ’e waadwyn syn tryst preekjen
oer it Winaem fan Tsjits fan ’t Nijehûs,
it fergean fan mannich ding fan wearde –

sa hâlde wy it betinken en it leedomsizzen
yn eare. Foar loft en lân aloan ús gean
jûns let fan doar nei doar yn ’e bedelte,
tsjin kassen en gas- en sâltwinning,

en hoe nulleskerp stekt de blingbling der
regionale ekonomy al ôf tsjin ’t ûnmachtich
ferset, dat mear strânljippen garje wolle soe
foar in militante gearsit oer it ôfjit.… Lês fierder

Tsjisse Hettema

De Slachte meandert…

Pleatst op
logo.ensafh

 

De Slachte meandert tusken glêsmuorren
befluorje it eachweid
aansen

ryp en grien fan Albert Heyn en al dy oare rimram
puollemuolket heal besopen út flústerfinsters wei
aansen

gas en salt lûke de wrâld
hjir
foar wûnder nei ûnderen
no

en de gemeente ferkeapet foar in
heale obol dit tûzenjierrich lânskip
foar in reis mei Charon
nei de glêzen hel
 

 

Abe de Vries, Wy, te leedomsizzen
Edwin de Groot, It wytget see
Meindert Bylsma, Pake
Elmar Kuiper, Realm of Chaos… Lês fierder

Elmar Kuiper

Realm of chaos

Pleatst op
logo.ensafh

 

Karl
de moshpit is in gierensirkel
wat wolst no
as skiere muontsenskaad
oer de harsens
en desibel útbonket

hollebatsers binne ek mar
minsken
ek al balte se as kij
en kuierje se net
op in ferlerne sneintemiddei
ha se winliken
de jui yn

it binne domdryste
bollen en naive keallen Karl
dy’t nuver snuve en skite

lit mar sitte
do hast dyn mikrofoan
dyn swit rûkt nei farske
kuil in oerlûd sil út dy
moartsje.

Foar Karl Willets, sjonger fan de Ingelske deathmetal band Bolt Thrower. Harren cultalbum ‘Realm of Chaos’ kaam yn 1989 út.
 

 

Abe de Vries, Wy, te leedomsizzen
Edwin de Groot, It wytget see
Meindert Bylsma, Pake
Tsjisse Hettema, De Slachte meandert….… Lês fierder

Meindert Bylsma

Pake

Pleatst op
logo.ensafh

 

Yn ’e kûveuze fan ‘e tiid,
as in gladiator yn ‘e aow,
fjochtet pake tsjin ‘e ynfaazje fan ’e eksoaten.

Mei broeikaskobben op ‘e siele
wiist er syn pakesizzer it paad fan no nei doe:
“Hjir wie de bulterige seize, dêr de skeane five.
Hjir siet pake efter in hikke
en dêr, dêr’t no dy reade paprika leit,
siet doe in ljip te striesmiten.”

Betondike, as by in fiadukt, rinne de paden
fan no nei doe, fan doe nei no,
fan ûntheistering nei fernuvering,
oer elkoar hinne: “In ljip pake,
is dat itselde as in soarte fan batterijhin
en wêrom smyt sa’nien mei strie?”… Lês fierder

Elmar Kuiper

afterparty

Pleatst op
logo.ensafh

 

ferlit dyn plak
draach de nacht oer
oan in iere fûgel

lis de klean
dimmen
op in protsje

sis aai poes
streakje
de stiknaden
sêft

ferjit net
wat útstrieling
docht

lekker koese broek
lekker sliepe trui… Lês fierder